Vaidyo Narayano Harihi – Greetings to all doctors!
“Hari himself is the physician for the body’s ailments,” as Kanakadasa described in his devotional composition (kirtane). While the famous saying “Vaidyo Narayano Harihi” reflects a vision of the Lord’s compassion and grace in the physician who heals the patient, and the deity Dhanvantari emerged during the churning of the ocean (Samudra Manthana) specifically to look after the well-being of all living beings in the world, in this eternal tradition, the Ashwini Kumaras also carry that same responsibility alongside us.
This National Doctors’ Day, observed on July 1st, is celebrated in memory of the birth and death anniversary of the renowned physician and former Chief Minister of West Bengal, Dr. Bidhan Chandra Roy. The medical profession is not merely an occupation — it is a most sacred service to humanity. Heartfelt National Doctors’ Day greetings to all doctors who, amid numerous challenges, give patients a new lease on life.
ವೈದ್ಯೋ ನಾರಾಯಣೋ ಹರಿಃ – ಎಲ್ಲ ವೈದ್ಯರಿಗೆ ಶುಭಾಶಯಗಳು!
“ದೇಹ ರೋಗಗಳಿಗೆ ಹರಿಯೇ ವೈದ್ಯ” ಎಂದು ಕನಕದಾಸರು ತಮ್ಮ ಕೀರ್ತನೆಯಲ್ಲಿ ಬಣ್ಣಿಸಿದ್ದಾರೆ. “ವೈದ್ಯೋ ನಾರಾಯಣೋ ಹರಿಃ” ಎಂಬ ಪ್ರಸಿದ್ಧ ಉಕ್ತಿಯು ರೋಗಿಯನ್ನು ಗುಣಪಡಿಸುವ ವೈದ್ಯನಲ್ಲಿ ಭಗವಂತನ ಕಾರುಣ್ಯದ-ಕೃಪೆಯ ದರ್ಶನವಾದರೆ, ಧನ್ವಂತರಿ ದೇವತೆಯು ಜಗತ್ತಿನ ಎಲ್ಲ ಜೀವರಾಶಿಗಳ ಯೋಗಕ್ಷೇಮ ನೋಡಿಕೊಳ್ಳಲೆಂದೇ ಸಮುದ್ರಮಥನದ ಸಮಯದಲ್ಲಿ ಉದ್ಭವಿಸಿದ ದೇವತೆಯಾದರೆ, ಈ ಸನಾತನ ಪರಂಪರೆಯಲ್ಲಿ ಅಶ್ವಿನೀ ಕುಮಾರರೂ ಅದೇ ಹೊಣೆಹೊತ್ತು ನಮ್ಮೊಂದಿಗಿದ್ದಾರೆ.
ಜುಲೈ 1ರಂದು ಆಚರಿಸಲಾಗುವ ಈ ರಾಷ್ಟ್ರೀಯ ವೈದ್ಯರ ದಿನವನ್ನು ಖ್ಯಾತ ವೈದ್ಯ ಹಾಗೂ ಪಶ್ಚಿಮ ಬಂಗಾಳದ ಮಾಜಿ ಮುಖ್ಯಮಂತ್ರಿಯಾಗಿದ್ದ ಡಾ. ಬಿಧಾನ್ ಚಂದ್ರ ರಾಯ್ ಅವರ ಜನ್ಮ ಮತ್ತು ಪುಣ್ಯತಿಥಿಯ ಸ್ಮರಣಾರ್ಥ ಆಚರಿಸಲಾಗುತ್ತದೆ. ವೈದ್ಯ ವೃತ್ತಿ ಎನ್ನುವುದು ಕೇವಲ ಉದ್ಯೋಗವಲ್ಲ, ಅದೊಂದು ಪರಮಪವಿತ್ರವಾದ ಮನುಕುಲದ ಸೇವೆ. ಅನೇಕ ಸವಾಲುಗಳ ಮಧ್ಯೆಯೂ ರೋಗಿಗಳಿಗೆ ಹೊಸ ಬಾಳು ಕೊಡುವ ಎಲ್ಲ ವೈದ್ಯರಿಗೂ ರಾಷ್ಟ್ರೀಯ ವೈದ್ಯರ ದಿನದ ಹೃತ್ಪೂರ್ವಕ ಶುಭಾಶಯಗಳು.
ಭಾರತದ ವೈದ್ಯಕೀಯ ಪರಂಪರೆಯು ಸಾವಿರಾರು ವರ್ಷಗಳಷ್ಟು ಪ್ರಾಚೀನವಾಗಿದ್ದು, ಮಾನವನ ದೇಹಪ್ರಕೃತಿ, ದೇಶ, ಕಾಲ, ಔಷಧೀಯ ಸಸ್ಯಗಳ ಕುರಿತು ನಡೆಸಿದ ಅಧ್ಯಯನ, ಪ್ರಯೋಗಗಳಿಂದ ಅಮೂಲ್ಯ ಜ್ಞಾನಸಂಪತ್ತು ಈ ನೆಲದಲ್ಲಿ ರೂಪುಗೊಂಡಿತು. ಮಹರ್ಷಿ ಚರಕ ರಚಿಸಿದ ಚರಕ ಸಂಹಿತೆ ಮತ್ತು ಮಹರ್ಷಿ ಸುಶ್ರುತ ರಚಿಸಿದ ಸುಶ್ರುತ ಸಂಹಿತೆ ಇಂದಿಗೂ ವೈದ್ಯಕೀಯ ಇತಿಹಾಸದ ಶ್ರೇಷ್ಠ ಗ್ರಂಥಗಳೆಂದು ಪರಿಗಣಿಸಲ್ಪಡುತ್ತವೆ. ವಿಶೇಷವಾಗಿ ಸುಶ್ರುತನನ್ನು ಶಸ್ತ್ರಚಿಕಿತ್ಸೆಯ ಪಿತಾಮಹ ಎಂದು ವಿಶ್ವವೇ ಗೌರವಿಸುತ್ತದೆ. ಈ ಪರಂಪರೆಯೇ ಎಲ್ಲ ಭಾರತೀಯ ಹಾಗೂ ವೈಶ್ವಿಕ ಚಿಕಿತ್ಸಾ ಪದ್ಧತಿಗಳ ಬೆಳವಣಿಗೆಗೆ ಬಲವಾದ ಅಡಿಪಾಯವಾಯಿತು.
ಆಧುನಿಕ ಭಾರತದಲ್ಲಿ, ಪಾಶ್ಚಾತ್ಯ ವೈದ್ಯಕೀಯ ಪದ್ಧತಿಯ ಜೊತೆಗೆ ಆಯುರ್ವೇದ, ಸಿದ್ಧ, ಯುನಾನಿ, ಹೋಮಿಯೋಪತಿ, ಯೋಗ ಮತ್ತು ನಾಟಿ-ವೈದ್ಯಕೀಯ ಚಿಕಿತ್ಸೆಗಳಿಗೂ ತಮ್ಮದೇ ಆದ ಸ್ಥಾನವಿದೆ. ರೋಗಿಯ ಸ್ಥಿತಿ, ವೈಜ್ಞಾನಿಕ ಸಾಕ್ಷ್ಯ ಮತ್ತು ವೈದ್ಯರ ಸಲಹೆಯ ಆಧಾರದ ಮೇಲೆ ಸೂಕ್ತ ಚಿಕಿತ್ಸೆಯನ್ನು ಆಯ್ಕೆ ಮಾಡುವುದು ಆರೋಗ್ಯಕರ ಸಮಾಜದ ಲಕ್ಷಣವಾಗಿದೆ. ವೈಜ್ಞಾನಿಕ ಸಂಶೋಧನೆಗಳಿಂದ ದೃಢೀಕರಿಸಲ್ಪಟ್ಟ ಚಿಕಿತ್ಸೆಗೆ ಆದ್ಯತೆ ನೀಡುವುದು ಮತ್ತು ವಿವಿಧ ವೈದ್ಯಕೀಯ ಪದ್ಧತಿಗಳಲ್ಲಿರುವ ಉಪಯುಕ್ತ ಜ್ಞಾನವನ್ನು ಸಮನ್ವಯಗೊಳಿಸುವುದು ಇಂದಿನ ಅಗತ್ಯವಾಗಿದೆ. ಆ ಅಗತ್ಯಗಳನ್ನು ಸಮನ್ವಯಗೊಳಿಸಿ ಚಿಕಿತ್ಸೆ ಕೊಡುವ ಲಕ್ಷ್ಯ ಹಾಗೂ ಧ್ಯೇಯವಿಟ್ಟುಕೊಂಡು ಪ್ರಾರಂಭವಾದ ಸಂಸ್ಥೆಯೇ ‘ಜಯದೇವ ಸ್ಮಾರಕ ಆಸ್ಪತ್ರೆ ಮತ್ತು ಸಂಶೋಧನ ಕೇಂದ್ರ’. ಇದು ರಾಷ್ಟ್ರೋತ್ಥಾನ ಪರಿಷತ್ತಿನ ಒಂದು ಹೆಮ್ಮೆಯ ಪ್ರಕಲ್ಪವಾಗಿದೆ.
ಭಾರತದ ವೈದ್ಯಕೀಯ ಶಿಕ್ಷಣ ಕ್ಷೇತ್ರವೂ ವೇಗವಾಗಿ ಬೆಳೆಯುತ್ತಿದೆ. ಇಂದು ದೇಶದಲ್ಲಿ ಸುಮಾರು 820ಕ್ಕೂ ಹೆಚ್ಚು ವೈದ್ಯಕೀಯ ಕಾಲೇಜುಗಳಿದ್ದು, 1,29,000ಕ್ಕೂ ಹೆಚ್ಚು MBBS ಸೀಟುಗಳು ಮತ್ತು 74,000ಕ್ಕೂ ಹೆಚ್ಚು ಸ್ನಾತಕೋತ್ತರ ಸೀಟುಗಳಿವೆ. ಕಳೆದ ಒಂದು ದಶಕದಲ್ಲಿ MBBS ಸೀಟುಗಳ ಸಂಖ್ಯೆ ಸುಮಾರು ಎರಡು ಪಟ್ಟು ಹೆಚ್ಚಾಗಿದ್ದು, ಕೇಂದ್ರ ಸರ್ಕಾರ 2030ರ ವೇಳೆಗೆ ಈ ಸಂಖ್ಯೆಯನ್ನು 1.5 ರಿಂದ 1.6 ಲಕ್ಷಕ್ಕೆ ಹೆಚ್ಚಿಸುವ ಗುರಿ ಹೊಂದಿದೆ. ಆಲೋಪಥಿ ವೈದ್ಯರ ಲೆಕ್ಕದಲ್ಲಿ ಪ್ರಸ್ತುತ ಪ್ರತಿ 1,055 ಜನರಿಗೆ ಒಬ್ಬ ವೈದ್ಯ ಲಭ್ಯವಿದ್ದು, AYUSH ವೈದ್ಯರನ್ನೂ ಸೇರಿಸಿದರೆ ಈ ಅನುಪಾತ 1:685 ಕ್ಕೆ ಸುಧಾರಿಸುತ್ತದೆ – ಇದು WHO ಶಿಫಾರಸು ಮಾಡುವ 1:1,000 ಅನುಪಾತಕ್ಕಿಂತ ಉತ್ತಮವಾಗಿದೆ. ಟೆಲಿಮೆಡಿಸಿನ್ ಮತ್ತು e-Sanjeevani ನಂತಹ ಡಿಜಿಟಲ್ ಆರೋಗ್ಯ ಸೇವೆಗಳು ದೂರದ ಹಳ್ಳಿಗಳಿಗೂ ತಜ್ಞ ವೈದ್ಯರ ಸಲಹೆಯನ್ನು ತಲುಪಿಸುತ್ತಿರುವುದು ಒಂದು ಗಮನಾರ್ಹ ಬೆಳವಣಿಗೆ.
ಭಾರತದಲ್ಲಿನ ವೈದ್ಯರು ಮತ್ತು ವಿಜ್ಞಾನಿಗಳು ಲಸಿಕೆ, ಔಷಧಗಳು, ಕೃತಕ ಬುದ್ಧಿಮತ್ತೆ ಆಧಾರಿತ ರೋಗನಿರ್ಣಯ, ಕ್ಯಾನ್ಸರ್, ಹೃದ್ರೋಗ ಮತ್ತು ಜನ್ಯವಿಜ್ಞಾನ ಕ್ಷೇತ್ರಗಳಲ್ಲಿ ಮಹತ್ವದ ಸಂಶೋಧನೆಗಳನ್ನು ನಡೆಸುತ್ತಿದ್ದಾರೆ. ಜಾಗತಿಕ ವೈದ್ಯಕೀಯ ಸಂಶೋಧನೆಯಲ್ಲೂ ಭಾರತೀಯರ ಛಾಪು ಅನನ್ಯ. 1968ರಲ್ಲಿ ಜೆನೆಟಿಕ್ ಕೋಡ್ ಸಂಶೋಧನೆಗಾಗಿ ನೊಬೆಲ್ ಪ್ರಶಸ್ತಿ ಪಡೆದ ಹರ್ ಗೋಬಿಂದ್ ಖುರಾನಾ, ಕಲ್ಕತ್ತಾದಲ್ಲಿ ಮಲೇರಿಯಾ ಪ್ರಸರಣದ ರಹಸ್ಯ ಬಿಡಿಸಿದ ರೊನಾಲ್ಡ್ ರಾಸ್, ಮತ್ತು WHOನ ಮುಖ್ಯ ವಿಜ್ಞಾನಿಯಾಗಿ ಸೇವೆ ಸಲ್ಲಿಸಿದ ಡಾ. ಸೌಮ್ಯಾ ಸ್ವಾಮಿನಾಥನ್ ಅವರಂತಹ ಸಾಧಕರು ಭಾರತ-ಅಮೇರಿಕಾ-ಯೂರೋಪ್ ನಡುವಿನ ಸಂಶೋಧನಾ ಸೇತುವೆಯಾಗಿದ್ದಾರೆ. ಭಾರತದ ICMR ಮತ್ತು AIIMSಗಳೂ ಜಾಗತಿಕ ಕ್ಲಿನಿಕಲ್ ಸಂಶೋಧನೆಯಲ್ಲಿ ಸಕ್ರಿಯ ಪಾಲುದಾರರಾಗಿವೆ. ಜೆನೆರಿಕ್ ಔಷಧ (ಜನೌಷಧಿ) ಉತ್ಪಾದನೆಯಲ್ಲಿ ಭಾರತ “ಜಗತ್ತಿನ ಔಷಧಾಲಯ” ಎಂದೇ ಪ್ರಸಿದ್ಧಿ ಪಡೆದಿದ್ದು, ಲಸಿಕೆ ಮತ್ತು ಔಷಧಗಳ ಮೂಲಕ ಕೋಟ್ಯಂತರ ಜನರ ಜೀವ ಉಳಿಸುತ್ತಿದೆ.
ಆದರೆ ಈ ಎಲ್ಲ ಪ್ರಗತಿಯ ಜೊತೆಗೇ ಒಂದು ಆತಂಕಕಾರಿ ಪ್ರವೃತ್ತಿಯೂ ಬೆಳೆಯುತ್ತಿದೆ. ಇಂದು ಅನೇಕ ಆಸ್ಪತ್ರೆಗಳು ಕಾರ್ಪೊರೇಟ್ ಮಾದರಿಯಲ್ಲಿ ನಡೆಯುತ್ತಿದ್ದು, ಲಾಭದ ಗುರಿಯೇ ಮುಖ್ಯವಾಗುತ್ತಿದೆ. CT, MRIನಂತಹ ಅತ್ಯಾಧುನಿಕ ತಂತ್ರಜ್ಞಾನಗಳ ಮೇಲಿನ ಅತಿಯಾದ ಅವಲಂಬನೆಯಿಂದ, ವೈದ್ಯ-ರೋಗಿಯ ನಡುವಿನ ಸಂವಾದ ಮತ್ತು ಮಾನವೀಯ ಸ್ಪರ್ಶ ಆಧಾರಿತ ಕ್ಲಿನಿಕಲ್ ಪರೀಕ್ಷೆ ಹಿನ್ನೆಲೆಗೆ ಸರಿಯುತ್ತಿದೆ; ಪರಿಣಾಮವಾಗಿ ರೋಗನಿರ್ಣಯ, ಶಸ್ತ್ರಚಿಕಿತ್ಸೆ ಮತ್ತು ಪುನರ್ವಸತಿ ಸಾಮಾನ್ಯ ಜನರಿಗೆ ದುಬಾರಿಯಾಗುತ್ತಿವೆ. ಔಷಧ ಉದ್ಯಮವೂ ಅಪಾರ ಲಾಭಗಳಿಸುವ ಕ್ಷೇತ್ರವಾಗಿ ಬೆಳೆದಿದ್ದು, ಸೇವಾ ಮನೋಭಾವ ಮೂಲೆಗುಂಪಾಗುತ್ತಿರುವ ಆತಂಕ ಸಮಾಜದಲ್ಲಿ ಹೆಚ್ಚುತ್ತಿದೆ. ಇಂತಹ ಸವಾಲಿನ ನಡುವೆಯೇ ತಂತ್ರಜ್ಞಾನ ಮತ್ತು ಮಾನವೀಯತೆ ಎರಡನ್ನೂ ಸಮತೋಲನದಲ್ಲಿಟ್ಟುಕೊಂಡು ಸೇವೆ ಸಲ್ಲಿಸುವ ಆದರ್ಶಪ್ರಾಯರಾದ ಸೇವಾ ಮನೋಭಾವದ ವೈದ್ಯರ ಸಂಖ್ಯೆಯೂ ಭಾರತದಲ್ಲಿ ಕಡಿಮೆಯಿಲ್ಲ.
ಜಗತ್ತನ್ನು ತಲ್ಲಣಗೊಳಿಸಿದ COVID-19 ಮಹಾಮಾರಿಯ ಸಂದರ್ಭದಲ್ಲಿ ವೈದ್ಯರು, ದಾದಿಯರು ಮತ್ತು ಆರೋಗ್ಯ ಸಿಬ್ಬಂದಿ ತಮ್ಮ ಕುಟುಂಬಗಳಿಂದ ದೂರವಿದ್ದು, ಅನೇಕ ಅಪಾಯಗಳನ್ನು ಎದುರಿಸಿ ಲಕ್ಷಾಂತರ ಜೀವಗಳನ್ನು ಉಳಿಸಲು ಹಗಲಿರುಳು ಶ್ರಮಿಸಿದರು. ಅನೇಕ ವೈದ್ಯರು ಸೋಂಕಿಗೆ ತುತ್ತಾಗಿ ಪ್ರಾಣವನ್ನೇ ಕಳೆದುಕೊಂಡರು. ಅವರ ಸೇವೆ ವೈದ್ಯಕೀಯ ವೃತ್ತಿಯು ಕೇವಲ ಉದ್ಯೋಗವಲ್ಲ, ಅದು ಮಾನವಸೇವೆಯ ಮಹಾಯಜ್ಞ ಎಂಬುದನ್ನು ಜಗತ್ತಿಗೆ ಮತ್ತೊಮ್ಮೆ ಮನವರಿಕೆ ಮಾಡಿಕೊಟ್ಟಿತು.
ವೈದ್ಯನೆಂದರೆ ಭರವಸೆ, ಧೈರ್ಯ ಮತ್ತು ಜೀವ ಉಳಿಸುವ ಸಂಕಲ್ಪದ ಮೂರ್ತರೂಪವೆನಿಸಬೇಕು! ನಿಜವಾದ ಜ್ಞಾನದ ಮೌಲ್ಯವು ಲೋಕಹಿತಕ್ಕಾಗಿ ಬಳಸಿದಾಗಲೇ ಹೆಚ್ಚುತ್ತದೆ. ಸನಾತನ ಜ್ಞಾನ-ವಿಜ್ಞಾನ, ಆಧುನಿಕ ವಿಜ್ಞಾನದ ಚಾಣಾಕ್ಷ-ತಾಂತ್ರಿಕ ಸಾಮರ್ಥ್ಯದ ಜೊತೆಗೆ ಕಾರುಣ್ಯವೂ ಸೇರಿದಾಗ ನಿಜವಾದ ಚಿಕಿತ್ಸೆ ಸಾಧ್ಯ ಎಂಬುದನ್ನು ಭಾರತದ ವೈದ್ಯಕೀಯ ಪರಂಪರೆ ನಿರಂತರವಾಗಿ ತೋರಿಸಿಕೊಟ್ಟಿದೆ. ಈ ರಾಷ್ಟ್ರೀಯ ವೈದ್ಯರ ದಿನದಂದು, ನಮ್ಮ ಜೀವ ಉಳಿಸುವ, ಜೀವ ಬೆಳಗಿಸುವ ಎಲ್ಲ ವೈದ್ಯರಿಗೆ ಹೃತ್ಪೂರ್ವಕ ಕೃತಜ್ಞತೆ ಹಾಗೂ ನಮನಗಳು.
#Rashtrotthana #RashtrotthanaParishat #rashtrotthanainrashtraseva #doctorsday #nationaldoctorsday #deardoctor #doctor #vaidyonarayanoharihi #DrBidhanChandraRoy